Fossahnoss á Hornströndum

Það var mikið heillaspor þegar Hornstrandir voru gerð- ar að friðlandi árið 1975, ákvörðun sem allir Íslendingar geta verið stoltir af, enda náttúran einstök á heimsvísu og svæðið vinsælt til útivistar. Óvíða í Evrópu er hægt að komast í slíka nálægð við náttúruna enda ekkert sem rýfur kyrrðina nema fuglar og óvenjuspök tófa. Á þessu 581 ferkílómetra friðlandi kannast flestir við Hornvík, Hornbjarg og Kálfatinda en einnig eru Hæla- víkurbjarg, Hlöðuvík og Aðalvík vinsælir viðkomu-staðir göngufólks. Víkurnar og firðirnir á austanverðum Hornströndum eru þó ekki síður tilkomumiklar, eins og Smiðjuvík, Furufjörður og Þaralátursfjörður. Skammt frá lúrir nyrsti jökull Íslands, Drangajökull, en síðan er í víkunum og fjörðunum fjöldi fossa og steypast þeir tilkomumestu ofan í sjó. Einn slíkur verður á leið göngu- fólks í grösugu dalverpi sem heitir Drífandisdalur. Í honum er tær bergvatnsá, Drífandisdalsá, sem fellur í sjó fram af þverhníptri bjargbrún. Heitir fossinn Dríf- andi og þótt ekki teljist hann til frægustu fossa landsins þá er hann sannkallað hnossgæti, líkt og umhverfið allt. Ofar í dalnum eru síðan minni fossar með árbökkum sem skreyttir eru hvönn. Þeir sem lausir eru við loft- hræðslu geta fikrað sig út á steinklöpp Drífanda og fylgst með vatninu steypast 50 m fram af þverhnípinu. Fara verður varlega því klöppin getur verið sleip og í henni er sprunga! Síðan er haldið upp hlíðarnar vestan Smiðjuvíkurbjargs og þannig horft yfir Drífanda og samnefndan dal úr fjarlægð.

Einfaldast er að komast í Drífandisdal frá Hornbjargs- vita en þar rekur Ferðafélag Íslands vel búinn skála. Þar er boðið upp á svefnpokagistingu, en frábært tjaldstæði við snarbratta sjávarhamra freistar margra. Yfir hásum- arið má komast í vitann á báti frá Norðurfirði á Strönd- um, Ísafirði eða Bolungarvík. Annar valkostur er viku- löng ganga með allt á bakinu frá Ófeigsfirði, en einnig má hefja nokkurra daga göngu úr Jökulfjörðum, t.d. frá Hesteyri eða Veiðileysufirði. Gangan frá Hornbjargsvita að Drífanda tekur hins vegar aðeins hálfan dag báðar leiðir og hentar jafnt ungum sem öldnum. Fyrir þá sem vilja lengri göngu er tilvalið að kíkja einnig í Smiðjuvík en þar var búið fram til 1933. Næstu daga má síðan nýta í fleiri dagsgöngur frá Hornbjargsvita, t.d. yfir í Hornvík, upp á Kálfatinda og út að Hælavíkurbjargi.