Í lok heimsstyrjaldarinnar fyrri varð frægt hugtakið “óþekkti hermaðurinn” (The Unknown Soldier) en með því vildu ríkisstjórnir vesturveldanna minna á hlutdeild óbreyttra hermanna í hildarleik stríðsins. Þannig létu ríkisstjórnir Bretlands og Frakklands jarðsetja óþekktan hermann í dómkirkjunni Westminster Abbey í Lundúnum og undir Sigurboganum í París. Upp af Ófeigs- og Eyvindarfirði á Ströndum eru hundruð fossa, flestir í þremur blátærum bergvatnsám: Hvalá, Rjúkandi og Eyvindarfjarðará. Sumir eru í hópi stórbrotnustu fossa landsins líkt og Drynjandi, Rjúkandi og Eyvindarfjarðarárfoss. Síðan eru tugir annarra tilkomumikilla fossa sem eiga sameiginlegt að bera ekki nafn. Það sýnir vel hversu ósnortið og fáfarið þetta svæði er. Þarna hafa fáeinir bændur smalað heiðar á haustin sem oftar en ekki eru afgirtar gljúfrum og ám. Í allmörg ár hefur staðið til að virkja bæði Hvalá og Eyvindarfjarðará. Þá hefðu þessir merku fossar minnkað mikið eða þornað upp sem hefði gjörbreytt ásýnd þessara ósnortnu náttúrparadísar. Til allrar hamingju var nýlega ákveðið að slá framkvæmdum við Hvalárvirkjun á frest – vonandi þó til frambúðar. Því að það er stórkostlegt að kynnast þessum ám og fossum í návígi en njóta um leið kyrrðarinnar á heiðinni og við ströndina. Fossarnir steypast fram af hörðum berglögum og í návígi við þá nötrar jörðin undir fótum manns. Við ströndina er mergð sjófugla og á góðum degi sjást þar selir og jafnvel hvalir.
Sérstaða svæðisins felst í því að þarna eru engir vegir; en titillinn á frábærri bók rithöfundarins Hrafns Jökulssonar um svæðið er einmitt Þar sem vegurinn endar. Þar er greint frá einstakri sögu Árneshrepps en einnig má þar finna lýsingar á skemmtilegum karakterum og stöðum í einum afskekktasta og víðfeðmasta hreppi Íslands. Það er einmitt sagan í bland við lítt snortna náttúru sem gerir ferðalag um Strandir svo eftirminnilegt. Fossarnir nafnlausu eru eins og punkturinn yfir i-ið á því ferðalagi og þá er auðveldara að nálgast en margir halda. Frá Hólmavík er 100 km akstur í Norðurfjörð þar sem gista má á hóteli eða í skála Ferðafélags Íslands sem einnig býður upp á frábært tjaldstæði. Skammt undan er Krossneslaug bókstaflega í flæðarmálinu og bíður upp á sjóðheitt útsýni að Reykjaneshyrnu og fjallgarðinum suður af Trékyllisvík. Frá Norðurfirði er tæplega klukkustundar akstur á jeppa að Hvalárfossum. Þaðan er tilvalið að leggja í göngu að óþekktu hermönnunum um leið og Drynjandi, Rjúkandi og Eyvindarárfoss eru skoðaðir.