Héðinsfjörður

Á milli Siglufjarðar og Ólafsfjarðar er töluvert nettari Héðinsfjörður. Hann var löngum á meðal einangruðustu fjarða á Íslandi, enda umkringja hann hrikaleg fjöll nema í norður þar sem hann mætir hafi. Þrátt fyrir mikil snjóþyngsli og erfiðar samgöngur bjuggu í byrjun 20. aldar 50 manns á fimm bæjum í Héðinsfirði og var Vík þeirra stærst. Aðeins hálfri öld síðar, eða 1951, fluttu síðustu ábúendurnir þaðan. Eftir standa rústir gömlu bæjanna í firði sem stöðugt laðar til sín fleiri ferðamenn. Skýringin á því eru tvenn göng sem voru opnuð 2010 og tengdu saman Ólafsfjörð og Siglufjörð í gegnum Héðinsfjörð. Þar með komst felufjörðurinn Héðinsfjörður út úr skápnum og varð skyndilega aðgengilegur bæði göngu- og skíðafólki. Þarna er líka vinsælt berjaland og í 2,5 km löngu og 1 km breiðu Héðinsfjarðarvatni við norðurenda fjarðarins er ágæt silungsveiði.

Fyrir tilkomu ganganna var oft farið sjóleiðina í Héð- insfjörð, enda þótt lending væri þar ekki auðveld. Þegar snjóa leysti opnuðust síðan gönguleiðir yfir til Ólafs- og Siglufjarðar, en þær eru bæði brattar og ná flestar um það bil 600 m hæð. Þessar sömu gönguleiðir má í dag nýta til útivistar en þær henta einnig ágætlega fyrir fjallaskíði. Ofan í firðinum eru ferðaskíði hins vegar ákjósanlegur ferðamáti að vetri til og hægt að ganga hann endilangan á nokkrum klukkustundum. Göngu- leiðir vestur í Siglufjörð eru aðallega tvær: annars vegar yfir Hestskarð í Skútudal og hins vegar aðeins lengri leið um Hólsskarð. Til Ólafsfjarðar eru þrjár gönguleiðir oftast gengnar: sú um Möðruvallaskál og Fossabrekkur ofan í Syðriárdal, um Víkurdal yfir Rauðuskörð og niður í Árdal, eða fremst í firðinum yfir Möðruvallaháls og niður í Skeggjabrekkudal. Fjöllin beggja vegna Héðinsfjarðar eru einstaklega tignarleg og með falleg nöfn eins og Vikurhyrna, Víkurbyrða, Pallahnjúkur, Fýluskálahnjúkur og Hesturinn. Árið 1947 flaug Daka- flugvél Flugfélags Íslands á hlíðar síðastnefnda fjallsins í þokuveðri. Tíndu 25 einstaklingar lífi og er þetta eitt stærsta flugslys Íslandssögunnar. Sprækt göngufólk getur gengið úr Héðinsfirði norðaustur í Hvanndali að Hvanndalabjargi. Sú ganga er krefjandi, tekur daginn og er ekki fyrir lofthrædda. Annar valkostur er að ganga eftir Héðinsfirði endilöngum og skoða rústir gömlu bæjanna, en eftir dalbotninum rennur snotur Fjarðará. Hugurinn hvarflar ósjálfrátt að harðri lífsbaráttu fólks sem þarna bjó við hrikalega einangrun, en um leið einstaka náttúrufegurð