Einhver stórkostlegasta náttúrusmíð á Íslandi er Stórurð við rætur Dyrfjalla á Héraði. Þarna er að finna grettistök sem eru á stærð við heilu húsin, en inn á milli leynast spegilsléttar tjarnir þar sem vatnið hefur sérkennilegan sægrænan blæ
Falinn fjársjóður
Ólíkt Dyrfjöllum, sem sjást víða að, þá er Stórurð falinn gimsteinn sem flestir hreinlega keyra fram hjá á leið sinni austur á Borgarfjörð eystri og Víkur
Auðvelt er að komast í Stórurð gangandi og eru nokkrar leiðir í boði, allar greiðfærar. Algengast er að ganga hring sem hefst og endar við Vatnsskarð eystra, Héraðsmegin, en að uppgöngustaðnum er aðeins hálftíma keyrsla frá Egilsstöðum. Þetta er um 16 km stikuð gönguleið fram og tilbaka og tekur daginn
Lego duplo
Upplifunin að koma að björgunum í Stórurð, sem eru eins og risavaxnir legókubbar sem fljóta á sægrænu jökulvatni, er engu lík
Græna undrið
Talið er að þessi stóru mosavöxnu björg hafi borist niður úr Dyrfjöllum með skríðandi jökli eða hlaupi af einhverju tagi. Græna vatnið er jökulbráð úr jöklum í hlíðum Dyrfjalla sem skapa ómótstæðilegt baksvið Stórurðar
með fallegustu stöðum landsins
Það er ekki hægt annað en heillast af náttúrufegurðinni í Stórurð og ótrúlegt að slík náttúruperla skuli hvorki vera friðland né tilheyra þjóðgarði. En sjón er sögu ríkari
litaandstæður
Svartir klettar, sægræn vötn og grænn mosi kallast skemmtilega á við og á vorin og fram eftir sumri bætist hvítur snjórinn
Viðkvæmur gróður
Í Urðinni eru fallegar mosabreiður og grasflatir þar sem harðgerðum blómum bregður fyrir. Gróðurinn er viðkvæmur og þess vegna mikilvægt að halda sig við stíga
Dýr leikmynd
Nálægðin við Dyrfjöll og 700 m breiðar dyrnar eykur enn á upplifunina af heimsókn í Stórurð og rammar hana inn eins og rándýr leiktjöld