Fagurblár Langisjór er tvímælalaust ein dýrmætasta náttúruperla á hálendi Íslands.
Nafnið má rekja til lengdar vatnsins sem er 20 km, en þótt það nái 75 m dýpt er mesta breidd aðeins um 2 km
Stórbrotið umhverfi
Ekin er sérlega falleg leið frá Fjallabaksleið nyrðri inn að Sveinstindi við Langasjó
Fögrufjöll
Langasjó umlykja fallegir mógbergshryggir sem mynduðust við gos undir jöklum ísalda. Þarna stela Fögrufjöll austan megin vatnsins algjörlega senunni en skammt undan er sjálfur Vatnajökull
Læknatindur
Suður af vatninu er Sveinstindur (1090m), frábært útsýnisfjall sem kennt er við Svein Pálsson lækni og náttúrufræðing sem var þarna á ferð sumarið 1794. Sveinstindur er vinsælt fjall til uppgöngu og tilvalin snörp dagsganga
Þorvaldur Thoroddsen
Það var hins vegar annar merkur náttúrufræðingur Þorvaldur Thoroddsen, sem gaf bæði Fögrufjöllum og Langasjó nafn árið 1889. Þá blasti Langisjór við honum sem mórrautt jókullón og gekk skriðjökull niður í hann nyrst. Þegar Síðujökull tók að hörfa á síðustu öld breytti kvísl úr Skaftá um stefnu og sveigði austur fyrir Fögrufjöll í stað þess að renna í Langasjó
Litaveisla
Við þetta varð Langisjór fagurblár á litinn og um leið eitt tærasta stöðuvatn landsins. Vötn austan við Langasjó eru einnig falleg á litinn, næstum sægræn, og mynda skemmtilega andstæðu við jökullitaða Skaftá
Ósnortið hálendi
Ganga má umhverfis Langasjó á 2-3 dögum með allt á bakinu. Þá verður að vaða Útfallið, affall Langasjávar sem rennur í Skaftá. Að öðru leyti er gangan þægileg og er gengið um vogskorin og mosavaxin Fögrufjöll sem skaga víða fram í vatnið með tilkomumiklum klettahöfðum.
Ást í Fagrafirði
Fiskur er í vatninu og þar er stunduð stangveiði en auk þess er Langisjór vinsæll fyrir kajaksiglingar. Er þá hægt að sigla umhverfis eyjuna Ást í Fagrafirði inn af Fögrufjöllum sem stendur undir nafni eins og allt umhverfið