Drangaskörð eru útvörður nyrsta hluta Stranda á Vestfjörðum og af mörgum talin ein stórkostlegasta náttúrusmíð á Íslandi. Þetta eru fimm eða sjö strýtur sem ganga fram af Skarðafjalli, rétt sunnan við friðlandið á Hornströndum
miðnætursól
Flestir hafa séð Skörðin af veginum út í Ingólfsfjörð, en það er stórkostleg sýn, sérstaklega í miðnætursól
risaeðlutennur
Drangarnir, sem helst minna á tennur í risaeðlu, eru gerðir úr bergstöflum sem jöklar og vatn hafa sorfið til
Drangar
Mörg örnefni vísa til þeirra eins og jörðin Drangar í norðvestri, Drangavík í suðri og sjálfur Drangajökull í vestri
Krúttlegt þorp
Oftast er siglt að Drangaskörðum frá Norðurfirði. Þar er skáli Ferðafélags Íslands en einnig frábært tjaldstæði. Skammt frá er Krossneslaug og ofan frystihússins er spennandi veitingastaður með sprikklandi sjávarfang
Stórkostleg sýn af sjó
ekki síst að kvöldlagi
Einstakt tjaldstæði
Helsta gönguleiðin hefst við Hvalárfossa í Ófeigsfirði „þar sem vegurinn endar“. Á 25 kílómetra langri leiðinni má virða fyrir sér fossaröðina í Eyvindarfirði og jafnvel slá þar upp tjöldum. Í Drangavík býðst sérlega fallegt útsýni til Drangaskarða og þar sem hægt er að tjalda innan um gamlar bæjarrústir en byggð lagðist þarna af á fimmta áratug síðustu aldar
Signýjargata
Þegar komið er að Skörðunum er mikilvægt að gefa sér góðan tíma og þræða eitt þeirra. Flestir velja ysta skarðið, Signýjargötu, en enn tilkomumeira er að þræða svokallað Kálfsskarð á milli tvískiptu tindanna tveggja. Brekkan sunnanmegin er þó brött og ekki fyrir lofthrædda, en þeim sömu býðst að ganga fyrir ysta drangann, Litlatind. Gróður efst í Drangaskörðum er afar fjölskrúðugur sem þakka má driti sjófugla sem halda til í snarbröttum klettunum
skörðin
Úr Skörðunum sést norður á Hornbjarg
skörðin þrædd
Það er ógleymanlegt að sjá Drangaskörð í návígi en það verður aðeins gert með bát eða gangandi. Reyndar flaug Ómar Ragnarsson í gegnum eitt skarðið í frægum Stikluþætti, en ekki er mælt með því að leika það eftir
þjóðargersemi
Tilvalið er að leggjast á bakið efst í skörðunum og fylgjast með fuglum þjóta hjá. Þess má geta að Drangaskörð hafa verið klifin af Hjálparsveitarskátum. Nýlega lýstu landeigendur Dranga yfir áhuga á því að friðlýsa Drangaskörð og nágrenni þeirra – sem vonandi verður að veruleika, enda þjóðargersemi